临近年尾，又係唔同类型嘅年度排行榜出炉嘅时候!「2018新语、流行语大赏」係由日本自由国民社主办嘅年度票选活动，由1984年开始到而家，每年都会拣出反映当个年度社会现象，范围涵盖时事、体育、流行文化等，预计将于12月3日公布十大流行语。唔知今年有咩最新潮语入围呢，以下呢几个热门字眼，哈日族又熟唔熟?
1.《尸杀片场》(カメ止め)
有冇人听个名以为又係恐怖丧尸片?呢部以低成本拍出来嘅电影，居然大收近30亿日元超高票房，个个都话要捱30分钟闷场之后就会笑爆肚，我仲未得闲去睇呀，唔好剧透!
2.金足农旋风
今年甲子园举办嘅日本全国高中棒球锦标赛，一队不知名嘅农业学校金足农爆冷成为黑马，由一开始冇人睇好到最后勇夺亚军，係今年日本球迷们觉得，最青春热血嘅棒球比赛故事。
3.虚拟货币/暗网 (仮想通货／ダークウェブ)
日本虚拟货币交易所Coincheck，年初被黑客盗取总额达580亿元NEM虚拟币，其后呢啲钱流到暗网交易，故暗网被认为係犯罪收益嘅温床。
4.大叔的爱 (おっさんずラブ)
日本热播嘅BL神剧，香港都有唔少粉丝追看，剧情劲爆笑！朝日电视台以同性爱情为主题播放嘅电视连续剧，打破以往男女相恋嘅剧情，连带剧中饰演男主角春田创一嘅田中圭人气爆登!
5.《你想活出怎样的人生》(君たちはどう生きるか)
原本係作家吉野源三郎于1937年推出嘅作品，透过一名15岁男孩嘅经历，吸引读者理解并反思人生各种状况，呢两年由羽贺翔一改编成漫画，销量达200万本，除咗係今年嘅畅销书籍，听闻宫崎骏亦想将呢部作品变成动画。
6.GAFA（ガーファ）
即係Google、Apple(苹果)、Facebook、Amazon四个美国科技界龙头嘅简称，几年前外国有学者推出以GIGA为主题嘅书，话畀大家知咩係GAFA，以及点样利用GAFA等，呢本书《THE FOUR: The Hidden DNA of Amazon- Apple(苹果)- Facebook- and Google》今年喺日本推出翻译版，成为畅销书籍，各大报章杂志一致好评。
7.肌肉唔会背叛你（筋肉は裏切らない）
係NHK电视台体操节目《大家的肌肉体操》嘅标语，用嚟鼓励观众锻鍊身体。今年8月开始由肌肉猛男做示范，观众反应非常热烈!不过我第一次听呢句说话，係因为艺人天海祐希曾经上节目讲「男人会背叛你，但肌肉不会背叛你」，令我印象好深刻!
8.电子竞技 (eスポーツ)
电竞被列入为2022年亚运会正式比赛项目，可惜日本奥林匹克委员会理事表明唔会承认电竞属于运动。不过越来越多地方将会加入电竞作为比赛项目，唔少日本玩家希望电竞早日普及，追上美、韩等电竞先进国。
9.恶质擒抱 (悪质タックル)
美式足球用语，指比赛过程中擒住并摔倒对方，但冲撞都有分係唔小心定恶意，今年5月日本大学就喺比赛中恶意犯规，令关西学院大学选手受伤入院3星期。事后犯规选手公开谢罪，大爆教练强迫学生进行激烈攻击，引起群众愤怒。
10.路怒症 (あおり运転)
因塞车、见到唔守规矩嘅司机、后方车辆恶意喇叭声…驾驶者往往会产生愤怒及紧张情绪，导致言语或肢体冲突。日本单係今年上半年就多达6千宗路怒症案件，比去年同期高2倍，于是今年公安开始加强管制，希望唔会再发生车祸。
图片来源：《大叔的爱》
